أخوتى وأخواتى
أسف جدا على الفترة التى إنقطعت فيها عن الكتابة والتواصل معكم , لم يكن هذا بالأمر السهل بالنسبة لى ,
لكننى كنت أحتاج لفترة من الوقت للجلوس أمام الفخارى الأعظم , كى يعيد تشكيل وعائى من جديد ,مثلما يحسن فى عينيه
وبحسب غنى نعمته
كما أننى لا أخفيكم سرا بأننى ونتيجة لأسباب كثيرة كنت أشعر بحالة خصام بينى وبين قلمى
عبرت عنه بكتابة قصيدة بالعامية المصرية ,بذات العنوان\ خصام
لذا رأيت أن تكون هذه القصيدة هى أول ما أعود به للتواصل معكم
إليكم قصيدتى , وأتمنى أن تحوز رضاكم
خصام
بينك وبين قلمك ...... خصام
والهم حبل من الوجع
لساه بيخنق فى الكلام
وألف ولام تعريف هزيمتك كركبوا
واتسرسبوا ف بحر الضلام
أحلام كتير أجلتها
وخنقتها بين ألف ليه
معرفش ليه مستبعدة الفرحة خطاك
ومعاك مخاض الأسئلة
ومتسلسلة جراحك طابور
والألف سور بيكتفوك
ويقدموك للهاوية
يمكن ف حضن الهاوية
تلقى الحبيبة اللى اختفت
يمكن ف ألسنة اللهب
تلقى الدهب أحزان تسيح
أو تستريح من وحدتك
وسط الجموع
يمكن تجوع تانى لشقا
ما انت اللى نور حريته
مربوط بفك الشرنقة
والعمر عيشته بدون سلام
بس الجديد ف المسألة
بينك وبين قلمك خصام
أشعار محمد حجازى\ بيشوى
الاشتراك في:
تعليقات الرسالة (Atom)
المشاركات
ليست هناك تعليقات:
إرسال تعليق