ف برية الحلم اللى ضاع
أوجاع كتير وذكريات
ف برية العمر اللى فات
وسكات بياخدك للغروب
على قد توب الحزن إفرد
للوجع فستان حزين
فستان بطول مر السنين الميتة
متشتتة همومك ف حارات البكا
ومفتتة وتر الغنا
يا أبو غنوة ماسخة إترددت
وإتمددت على طرف كل الألسنة
لساك معاند للزمن؟!
ومصر تدفع للتمن رغم الجراح؟!
معرفشى ليه دنيا البراح بتخوفك
وبتكشفك قدام مرايات الوجع
أنا مش جدع
وأظن إنى مش نبى
لكنى خفت ف ليل سكاتهم تهربى
وتهربى حلمى ف تابوت
ولقيتنى جوه الحوت يونان
تاجر بغنوتى الزمان
ولا حد خاسر غيرى انا
وكرهت طعم العنعنة
وكرهت حدثنا فلان
اه يازمان النخاسين
ويابياعين حلمى اللى ضاع
أنا لسة شايل للى جاى
مركب ورق
لكن ف وسطيها الشراع
رغم إنى متباع الغنا
رغم إنى مفضوح الأنين
لكنى شايف ف السنين
غنوة حنين
تقدر تاخدنا للشطوط
تقدر تفوت على كدبكم
من غير ما تشرب منكم
ولعلمكم
الحوت ف أحشاءه دفا
مش زيكم
برد وبعاد
اه يابلاد الحلم يا بلاد الامال
لجل الغناوى ف شطكم شديت رحال
ولا مرة مال ليا الوصول
وشرعت أقول
أنا مش يونان
أنا مش نبى
أنا بس وحياة غنوتى
مش عايز اسيبك تهربى !!
شعر وكلمات / محمد حجازى ( بيشوى أرميا بولس)
الاشتراك في:
تعليقات الرسالة (Atom)
المشاركات
ليست هناك تعليقات:
إرسال تعليق